Omanóva Angue

Omanóva Angue

                Amo Pirapo gotyo oikova`ekue petei͂ tapicha py`aguasu, kuimba`e kyhyje`y͂va niko,  ha`e camionero, oho heta hendápe, avei teta͂ ambuére mombyry mombyry ohomiva`era͂ ogueraha mandyju, soja, sorgo, ha opa mba`e, sapy`ánte oho táva Asunción gotyo, petei͂ jey oho jave omombe`u mba`épa oiko hese, péva ndaje oiko petei͂ vierne pyharépe okypotaite ndeje upéro͂guare, pe ára overa ovyvypa ha`ete ndaje okúitava pe yvága,  hákatu  jepevéro͂ oho, ohasáramo amo Ayola jeikeha rupive ohecha tape ykére petei͂ kuñatai͂ oi͂va ha ohape joko ichupe, upyta ohupi  kuñatai͂me ha ohomeme, ñomongetápe oho hikuái.

                Rireminte he`i pe kuñatai͂ ikatúnepa omboguejy ichupe petei͂ tendápe ha`e ohechakataha moo͂itépa ha omonei͂ chupe ko tapicha, oguahe͂vo he`ihaguépe omomarandu moo͂itépa oguejyse ha ohechauka chupe moo͂itépa opyta isy róga, namombyrýi rútagui, pe karia`y ohechakuaa kuñatai͂re iro`ytaha ha oipuruka ichupe ikampéra oguerekova`ekue ijykére,kuñatai͂ omboaje chupe ha he`i ojevývo Asunción-gui og͂uahe͂ hag͂ua ijao piári isy rógape, omombe`u chupe héra ha mba`e, ha oguejy oho hag͂ua hógape, oguejývo ndojekuaavéima voi pe kuñatai͂ mba`éta pytu͂ hu͂ mba`evete asy voi ndojekuaái okápe.

          Vy`ápe ose͂ oho pe karia`y, onovi nunga voi opytávo pe kuñatai͂re, mita͂kuña nepora͂va ndaje, oho og͂uahe͂ táva Asunción-pe tuicha omombe`u upe rupi ojuhu hague pe kuñáme ha ipora͂hámante omombe`u ha oipuruka hague chupe ijaopyrusu ha ojevývo oguahe͂taha henda rupi.

          Moko͂i ára rire ojevy hóga gotyo, péva aratei͂me ojevy, tage͂me ou ohechasetereíma pe kuñatai͂me. Hata͂ ogueroguata imba`yru oúvo, mbohapy téra irundy aravópe og͂uahe͂mane katu kuñatai͂ rógape,oguejy imba`yrúgui ha oho omomaitei hag͂ua chupe, oikévo pe korapýpe ose͂ petei͂ lechai͂mi ha oporandu mba`épa oikoteve͂ ha ombohovái karia`y he`ívo ohechaseha Marcelina-pe, oipuruka hague chupe ijao ha oguerahasejeyha, ha araka`e piko upéva he`i ndaje pe kuñakaraimi, ha kuehe ambue ombohovái karia`y, omombe`u chupe mba`eichaitépa oiko, upépe kuñakarai oñepyru͂ hase͂ osyry hesay hováre omomarandúvo pe karia`ýpe Marcelina ojapóma 10 ary omano hague ha ohechauka ichupe petei͂ ta`anga heseguare, upépe ojupi petei͂ piri͂ pe karia`ýre ndoroviaséi pe ohendúva upémaro͂ oho ogueraha chupe hikuái tyvytýpe, ha upépe ojuhu tyvyty ári ijao oi͂ hina oi͂hápe pe kuñatai͂ re`ongue, tuicha oñemondýi pe karia`y.

        Omombe`u ogayguakuéra pe kuñatai͂ omano hague pe Ayolas jeikeha ypy  rupi, ohokuévo táva Asunción gotyo ha ojapóma pa ary oiko hague pe mba`e vai.

         Upépe ose͂ pe karia`y ojupi imba`yrúpe ha omaña`y͂re hapykue gotyo ohoite hese, og͂uahe͂vo hógape oguejýrentema mba`yrúgui oho oike ikotýpe ha oñepyru͂ omyataindy ha oñembo`e opa santo oikuaávape, tuicha niko oñemondýi umi mba`e oikova`ekuére hese, oi͂vape omombe`u ha mavavénte ndoroviaséi chupe.

Oho jey vove Asunción gotyo ojupi mboyve imba`yrúpe ha`e oñembo`éma ani hag͂ua ojehu chupe mba`eve ivaíva tapére. Upe guive máro͂ ndohechavéiva mba`eve tape ykére, oka`úvamante sapy`ánte ohecha okéva kunétare…

Opa…

Ohai: Gustavo González